2009年9月25日 星期五

自我檢討

最近我這個blog是有點古怪,我必須好好檢討自己所犯下的錯誤……

錯誤之一,在facebook太濫交。通常見到對方的朋友名單內有我相熟的朋友,我就會add,可能當中有人同我有血海深仇(我話可能咋),我都照當對方係朋友,於是我在facebook的一舉一動都被某些可能心理有問題的(又係可能咋)陌生人完全了解,天真成咁,真係低能到無朋友。

錯誤之二,我太樂於表達意見。一開始已經有朋友(唉,仲要係後輩)提醒我唔好輕易表態支持任何一方,我又一次天真地認為支持還支持,我相信自己完全無影響力,而且更相信自己說話中肯,所以表達支持也只是一種心意。但事實係我支持一方就可能會(真係只係可能咋)惹來其他人士的不滿,我以為人人都會明辨是非講道理,事實上世事未必係咁(我話未必係咁,即係可以係咁,又可以唔係咁呀,不過又未必係咁呀)。

錯誤之三,我對網上的意見太認真。我的另一個小友教我的金句:“一旦認真你就輸。”對於近來接二連三在網上發生的留言攻擊事件,我想我實在是處理得太認真了(直情係誇張到悶,簡直想趕客呀),又有一個學生提點我說:“呢種人,你越理佢佢越以為自己重要呀!”(你睇,我十年前教出嚟嘅學生都豁達過我咁多,我係唔係應該好慚愧呢)我的確唔應該對那些極有可能(嗱,係極有可能咋,可能又唔係架)有其他目的,“搵唔到嘢鬧,想借小小嘢發圍”的人士及其言論太過認真,又刪帖又回應咁大陣仗,某程度上係一種助長,更可能讓他們躲在自己家中那個陰暗的角落,對著電腦發出一兩聲孤寂而陰險嘅冷笑呀。

犯下三重錯誤,的確罪有應得。經過深切檢討,我決定進一步移除facebook上不太相熟,行為可疑,甚至只係張相樣衰令人不安的人士。在facebook上並不需要很民主(妖,真係陌生人咋,同佢做人世咩),這是一個私隱度很低的地方,我們很容易就會交錯朋友,你永遠唔知那些錯朋友幾時會發作,甚至發了作你都唔一定會知,所以以後嚴格挑選facebook的真朋友,確是一種必需。

明確表達自己的意見是每個人的基本權利,只要沒有傷害別人就可以。有人話:“如果條友睇你唔順眼,佢見到你呼吸都會去投訴啦,咁唔通你真係要為佢自殺咩”,所以我還是會寫我認為值得寫的題材,古靈精怪的事改變不了我的。

對於某些極個別而且想法特別的網民的批評,我也經過深刻反省,刪人帖的確令人痛心,但係人家匿名謾罵(而且一晚寫幾篇來罵)又的確令這裡不太清靜,再出現這些刪帖事件,我就很有可能再被人批評為無膽接受批評,唔識民主,唔係公眾人物應有態度(引述自我刪了的留言),總之就會被人鬧得就鬧,所以如果下次再發生類似事件,我會更改留言管理系統,變成要由我授權才可呈現留言,反正平時這裡留言就不多,我相信我加強管理不會影響大家看文章的。

檢討完畢,人家想我認錯,我就真的認錯了,人家想我把文章再貼出來證明自己沒有攻擊別人,我就連讀者意見都貼出來了,絕對係嚴肅處理(聽話成咁,說明我真係驚,網上惡霸橫行,唔到我唔怕呀)。

意外收獲是今次有幾位認識或不認識的讀者朋友現身留下一些令我安慰的說話,可感可佩,我之所以重視這件事,只因幾年來已經遇過這種事很多次,我在試著令讀者了解我的處境,同時希望大家別擔心我,也別為那些連名字都沒有的留言多費心思,躲在暗處看我們的人不值得大家多花時間,要不然,他們會以為自己真的很重要呢!(叫人唔好理,自己又寫咁長,證明我真係比班友嚇破膽啦,希望永遠唔好再見到嗰d人,亦希望佢地永遠見我唔到)

9 則留言:

  1. 我也提點意見,FB裡面的朋友應該分好組別,設定每個組別可以觀看的內容。自己的隱私設定也要做得好,免得一些很無聊但很受好友歡迎的東西,變成那些唔係好熟的人用來攻擊你的內容。

    回覆刪除
  2. 完全接受,將會陸續整理.
    踩過一次屎,知道d屎好臭,仲要花時間清理,見過呢d鬼,會怕黑.

    回覆刪除
  3. 哇~原來咁大陣仗??

    寂大佬
    高登金句:認真就輸了

    你回咁大篇0野盞有排煩

    寫下生活寫下電影寫下文學好過啦

    回覆刪除
  4. 尺:
    認真係會輸,我都知,不過那些人的手段我也略知一二,不把事情說清楚,還不是一樣有排煩.

    他們完全不用負責任,我就家人朋友都會來這裡看,我對關心的的人負責吧.

    我又在寫小說了,大把有意義的事要做啦,我的生活好充實呢.

    回覆刪除
  5. 一直都是用“寂然”的筆名寫文章,實在不算是“公衆人物”,爲什麽就要受“公衆的評價”?至於那些打擊您的人,我認爲來來去去都是同一班(甚至同一個)人在不斷找機會抹黑,真的很無聊變態低層次!應該是同一班人還在cyberctm不斷評擊您、展鵬和文輝,口吻一樣,還說阿鳳在facebook找了一大班“打手”散播宣傳,哎!Facebook大家有名有姓有樣,都叫“打手”!OMG!我原本和你一樣,很氣憤,但後來發覺他們其實只是同一班低層次的“宅男”(我覺得是女人的機會很低)。

    回覆刪除
  6. rebeca :
    謝謝你來留言,人家想搞什麼,我們不好猜度,我想讀者的眼光是雪亮的,他們不會被小動作影響,我們也不會因為這類怪事而動搖,我們做好自己的本分,大家都會看得見的.

    回覆刪除
  7. 我諗好多都會遇過被人惡意留言攻擊既事,而且你越認真回應佢就越同你糾纏不清,因為呢班人無人性兼癲喪癡狂,邊樹似係會同你講道理既人,講左佢地都未必消化得到,所以,最好既方法就係唔好應佢。我自己都身受其害過,自然反應梗係回應自衛,不過,只係回應一次然後就封鎖為不可回應文章。講真,我個時都興到火遮眼,仲邊樹有心情介意被你班牛鬼蛇神話「無膽接受批評,唔識民主」,我話知你啦,你地來我踩場,我係場主梗係有權刪鬼左你,費事篤眼篤鼻影響視覺之餘又影響真正關心自己既朋友,我睇你唔到,因為你地係MR NOBODY!寂然兄,我撐你!

    回覆刪除
  8. 寂老兄:
    樹大招風呀,你幾謙虛都好,澳門街都會有人眼紅你,佢地匿名打擊你係唔需要成本,你主動講番件事都係明智,澳門人太單純,講咩都有人信,你自己將件事講清楚,讀者都知道有人針對你,唔會咁易信佢地的說話.

    “搵唔到嘢鬧,想借小小嘢發圍”呢句真係中呀,發唔到圍,仲要比好多人睇清楚呢班人嘅所作所為.寂老兄,呢件事,你認真,但沒有輸!

    回覆刪除
  9. 格子:
    謝謝你越洋來撐,這真是小事,我也真的不會生氣,寫出來,只想讓大家看看我的情況,希望以後跟那些人河水不犯井水,可惜我永遠不知道那些是什麼人.

    文浩:
    我只是小幼苗,自身難保,無力招風的.認真你就輸絕對適用於討論區,大家也不知對方是誰,真的不用認真,可是我這裡不同,有我的朋友家人在看,對方知道我是誰,我對他們一無所知,這就不到我不認真了.其實,在我的版面出了這樣的事,無論如何都是我輸了.

    回覆刪除