The End of the F***ing World

呢個世界真係太奇怪，咩事都有可能發生，未到最後又真係唔知結局，但有時又好似電視劇咁所有嘢事前已經寫好劇本，以便相關人士出場演戲。

最近我沉迷煲劇，一不小心就睇哂成季，其實個世界真係要幾荒謬有幾荒謬，有想法嘅人真係會好辛苦，年輕人又要默默吞忍成年人種下嘅苦果，而且眼白白睇住日子過得一日衰過一日，厭世好似變成唯一出路，但其實又唔係真係一條出路。

煲劇期間腦中不停閃現Natural Born Killers嘅情節，總覺得兩者係有關聯。少男少女各有苦處雙雙出走擺脫枷鎖然後浪漫地奔向悲情，結果會點已經唔重要，重要嘅係曾經有勇氣走出去，而且過程轟轟烈烈。

今時今日，真係有好多嘢會令人嬲到講粗口，此劇開宗明義嘅劇名真係深得我心，而且只得8集，每集不超過30分鐘，節奏明快，雖然承載咗好沉重嘅劇情，但導演處理得好爽好有趣，音樂同選播嘅歌都好出色，睇完會好同情呢對年輕人，唔忍心見到佢哋咁絕望。