眾所周知，職場同鬥獸場一樣，有人覺得新奇好玩，有人每日掙扎求存，本來都平常不過。市面上有不少貌似學歷很高，思維卻似小學生的傻豬豬，經常就職場小事發出呻吟，為保大家耳根清靜，本欄精選熱門問題詳盡解答，希望小學雞們趨吉避凶或迷途知返。
經常被同事屈請食飯，如何拒絕而不失霸氣?
如果你唔同同事一齊食飯會死，建議你繼續被屈，或者想辦法屈其他人。但其實唔同同事食飯係唔會死，不如試試擴闊社交圈子，自己出去搵(飯)食啦!
好心請同事食飯，點解被大家“食完唱”為收買人心耍手段?
老老實實，如非收買人心又唔係耍手段，何必搞到請同事食飯咁奢華?如欲表示友好，請食零食已ok，對同事太好，佢地會受唔起。
同事個個表裡不一，表面友善，暗藏陰險，感覺上好難做到朋友?
唔好自己扼自己啦，同事之間只可“扮”朋友是常識吧!
發現做了幾萬件好事都無人讚賞，但犯下一點小錯即被無限放大圍住插，可以點做?
你每月準時出糧，已是最好獎賞，仲想點呢?至於做錯事被圍插，也屬工作一部份，要怪只能怪自己未學識瀨嘢而不失霸氣囉!
懷疑公司是武林聖地，同事全部精於太極推手及用口放暗器，如何自保?
我個人係好反對暴力，不過見你咁上進，不妨建議你學鐵沙掌插佢，學大力金鋼腿踢佢，最好學埋刀槍不入嘅少林金鐘罩，咁就冇得輸啦!
同事開會時得個吹字，而且吹咗當做咗，究竟邊個真係會做嘢?
江湖事江湖了，吹咗嘅水終有一日要還，唔係你做就得啦。
淪為打工奴隸，日日做到冇停手，同時公司內有大量打工皇帝，零貢獻兼阻住地球轉，點算呀?
就算一張廁紙一條底褲都有佢本身嘅價值，或者你同事提供另類服務你唔知呢!職業無分貴賤，作為奴隸你都唔好歧視自己呀!
公司明確鼓勵同事們主動及積極親吻老闆之臀部，唔想做老闆隻狗，點算好?
你唔做大把人做，好叻咩?睇死你口裡說不，其實暗中好想做。
如果發現上司想整走我，有咩需要注意?
保持尊嚴，同佢講你有事走先。講笑咋，快主動獻身做隻狗，打死都唔走。
(刊於2013年9月11日澳門日報新園地)
.jpeg)
沒有留言:
張貼留言