2010年2月20日 星期六

閒談


過年期間都在偷懶,新年假期都唔偷懶真係唔知可以等幾時,因此除咗必定要交的稿件,咩都唔做,咩都唔寫,小倆口子自閉在家中玩煮飯仔,生活多美好。

天氣太凍令人咩都唔想做,今年新年實在凍到離x譜,我肥大肉厚兼唔出街都覺得凍,出街實死梗。希望快d回暖,令日子過得無咁悶。

年初五多數朋友都要返工啦,我在新環境上班,還算過得開心。經過過去幾份工作的經驗,我覺得返工的其中一個奧秘就係努力令自己張工作枱整齊乾淨,即係要唔好亂,唔好有一大堆文件堆積如山,該處理就快快處理,該歸檔就快快分類歸檔,唔好有太多沒有用的物品阻礙工作空間,更重要係唔好令自己個位太個性化(咁樣好易令自己唔想收工而拖長d工作來做架)。哈哈,我呢d想法其實幾無聊,不過我最近都係諗緊呢類嘢,仲實踐得幾開心,希望呢d諗法會令工作更快樂啦!

因為要返工,所以就必需出街。新年出街的一大問題就係要派利是,我已婚多年,但其實仍不習慣派利是,當然親朋戚友相聚時我都非常自動自覺,出到街就未必有太高的警覺性,新年期間見到小朋友會比較容易記得自己要派利是,見到成年的朋友時,往往對方跟我打一個招呼,然後我又出於本能反應跟對方打番一個招呼,之後大家擦身而過,之後我才會想一想,咦,剛才那位,好像未結婚的,我是否應該派利是呢,唉,又忘記了,對方可能會暗中罵我孤x寒呢!新年出街,我就有好多呢d思想掙扎,其實我估計大部分朋友都唔會小器,不過我總會覺得自己做漏咗,真係幾無聊囉!

圖片來源:我攝於熱辣辣的旗津海灘

2 則留言:

  1. 哈~~
    利是好緊要GA~~~~
    無謂的思想掙扎時,就應回到傳統思想上啊~ XDDD

    回覆刪除
  2. 我係知好緊要,不過有時真係太趕忙,把握唔到機會.

    回覆刪除