瑣碎事

《1Q 84》原來係有d料到，你以為佢悶，佢又唔係悶，仲寫到好似好懸疑咁。但係現在大家睇過咁多東野圭吾同宮部美幸，仲有咩懸疑情節未見過呢？但係村上春樹就係寫到比你感覺到佢唔係咁簡單。咁又有幾唔簡單呢？真係要努力追落去，因為最近比較忙，睇書時間少咗，我仲未睇完第一冊，但係會追落去，追到現在個感覺係好過《海邊的卡夫卡》。唔知我係唔係有偏見呢？

有一日等人期間，我唔覺意睇完咗錢穆本《現代中國學術論衡》，係呀，睇錢穆竟然快過睇村上春樹，分明係有病啦。錢穆d書真係好睇架，呂思勉都好睇架，如果心情唔好，睇完個人就會定d囉，成個民族嘅歷史同你自己個人嘅濕碎事相比，你仲有咩值得睇唔開呢？哈哈哈哈哈，我成日係咁自己呃自己架。

因為唔夠時間又唔夠精神，有時我都唔知d時間應該用嚟睇書定用嚟寫blog，不過個真相係我一有時間就用嚟睇30 rock，呢套美劇唔係真係勁好笑同勁好睇嗰隻，不過好睇在個氣氛輕輕鬆鬆，幾乎每集都係講個女主角遇到勁無奈又勁荒謬嘅麻煩事，佢有時解決到，有時解決唔到，但係佢始終喜歡佢身邊嗰一大班麻煩友，咁幾好呀，充滿正能量呀，我每次睇完都覺得自己怨氣減少咗呀。順便一提，上星期六有條友同我講《宮心計》真係好好睇，睇呢d電視劇佢學到好多做人道理。我只可以話我半秒都未睇過，可能真係錯過咗好嘢！條友仲教我上網睇番，真係好熱心。不過算啦，《大時代》之後我從未認真睇過無線電視劇架，估計我同時代已經完全脫節，但係我真係覺得唔睇無損失囉。

七年前今日，所有親朋好友做人情嚟飲我嗰餐，七年後嘅今晚，我就比大家睇吓我用咩嚟慶祝周年紀念日啦，今晚食得好放肆，不過，一年一次，係應該放縱一下嘅！