2009年11月8日 星期日

橫琴.單車.蠔與文藝激盪的半日活動







今日受某幫文藝青年引誘,拉幫結派,北上尋歡,極盡低能。

平日北上,多喜單打獨鬥,以單嫖獨賭之氣魄在珠海地下商場一帶活動,最遠去到文華書城,買完書即欲南下回歸本澳,飲食活動,不離真功夫與酸辣麵,早去早回之情,溢於言表。

今日北上,因有公子某攜同文藝少女數名,並有壯男若干,惡向膽邊生,竟打起不毛之地橫琴島的主意來,事先言明,食完當地肥美之蠔大餐即各行各路。奈何眾人難得一聚,遂有好事之徒提出各種迷惑人心的鬼主意,本大少稍一不慎,即無厘頭被送到一處名為石博園之名勝遊玩。






石博園者,有三數大石,乾塘瀑布一個,猿猴兩隻,湖水一池,神灣波蘿加豆腐花小店一間,入場券正價六十大元,眾人心有不甘,在門口商議之際,得門票處阿嬸體諒,竟以老人優惠價四十大元放行入內開眼界,眾人大喜。

旋入園內,即見無甚可觀,無物可玩,此時另一阿嬸強烈建議眾人租單車一遊,並謂園內單車徑甚完善,其實阿嬸之單車甚殘,車輪漏氣,但眾人嚮往田野郊遊踏單車之浮跨行徑,竟真奉上銀兩若干,各自騎車而去,不亦快哉。

優雅的文字到此打住,頂佢個肺,嗰條所謂單車徑,簡直係越野單車路,崎嶇不平,完全搵笨。我對上一次踩單車,恐怕已經係十幾年前嘅事,今日一踩,果然吃力,不過總算係一個特別的活動。

踩完單車,按公園小冊子介紹去睇奇石,一睇再睇,所謂奇石,都唔知有咩好睇,我影咗兩張相比大家睇,唔知係咩人會諗到要展覽呢d石,呢d同志真係好有諗頭囉!反映哂佢自己d品味呀!



其後去人氣甚盛之生態農莊食蠔,橫琴之蠔果然名不虛傳,的確好食,全日活動以此為高潮。

食完飯即閃,今日最大發現,原來我屋企有巴士直通蓮花口岸,一直以為很難去的地方,原來係最易去,真係估佢唔到。

後記:今日幾好玩,感謝今日組織活動的M姑娘和L公子,下次有好玩的預埋我呀.

2 則留言: